Beste Moeërebuuk en Moeërinne

Ich Prins Henri I , 59e prins vanne Moerebuuk

Aodste zoon van Jan Verstappen van Harrie de loeënwirker en Dora vanne Kanteneer,

en van Elly van Miet vanne békker en Piet vanne meister,

gebore mèt ein ónvervalstj vastelaoveshert en opgegruutj in mien dörpke Èll.

Ich bèn eine vereinigings man in hert en nere:

Al nege jaor trots veurzitter van 't kinjervakantiewerk, ein van mien groeëtste hobby's

Veur de dagelikse óntspanning bèn ich secretaris van Stichting Juiste Kien

Veer kieër per jaor mèt de spoeëketochte in 't Èller brook te vinje.

Ich bèn eine echte sportfanaat, zoeë bèn ich dèk te vinje inne kantien vanne voetbalclub,

woeë ich mèt spanning de derdje helft oppe voot volg, en meistal laat oppe aovendj nog ein naobesjouwing gaef.

Sjerpste sjötter bie de sjötterie, woeëbie ich gein sjöttefieëst laot sjete.

Ich bèn eine leefhöbber van ein good glaas beer en get stómme zeiver bie Siem of Marlies aan 't buffet,

woeë 't meistal get oet de handj löptj, en ich den oet veiligheidseuverweginge pas heives loup

as 't weer leecht begintj te waere.

Veur mien werk mót ich veul zeivere mèt mien klantje, as verkoup-adviseur bie van Eck verdeen ich de kost.

Vastelaovendj is mien löst en mien laeve, dae ich eder jaor as Vorst same mèt René maag belaeve.

Bestuurslid vanne carnavalsvereiniging doon ich gaer, dit jaor as Prins mèt de vaer.

Dit jaor maag Vorst René ouch 't spraekwerk verzörge, en zal ich as prins de vastelaovendj vere.

Eine goje Raod zal ós daobie allebei assistere.

Al mieër den 11 jaor as artiest oppe bóntje aovendj mèt gedaon.

En mèt de groep Proem, die mich de aafgeloupe jaore neet allein lete staon.

Mien adjudante oetzeuke waas neet eenvoudig zoeë wie 't bleek,

neet zoeëmer ederein pèstj dae steek.

Aod Prins Siem en aod adjudant Berend, det laag veur de handj,

in 2000 ginge wae same veurop door 't Moeërelandj.

De aafspraok waas, dit doon we euver ein paar jaor nog 'ns,

mer den mèt michzelf as de Prins.

Aan naeve höb ich gein gebrek, mer elf adjudanten det weurtj te gek.

Adjudant naef Pieter, de aodste en verstenjigste, det gaotj gae nog waal merke,

zal ózze groep technisch en mentaal versterke.

Same mèt de dames, Corine, Hanneke en Sanne is de groep kómplieët.

De vastelaovendj kan beginne, 't is werkelik vrieët.

Den kóm ich tot slot bie Roy, eine echte Pinmaeker, miene steun en toeverlaot.

Prinses kan ich hum neet numme,

en al is neet ederein 't daomèt ins, wie den ouch ……. dit is miene Prins.

Bie de gratie vanne Raod van Elf, Groeëtvorst Jan en Vorst René, verklaor ich hiebie 't volgendje:

* Det de naam Èll, dees daag zal verangere in 't Moeërelandj

* Det de Sebastiaanstraot vanaaf noe tot aan aswoonsdig de Prinsestraot zal heite

* Det de Prinsestraot 't kloppendj hert van 't oetgaonslaeve zal zeen

* De Prinselikke wuuening dao gelaege, neet veurbie gegange weurtj zónger eine “Alaaf”, wie laat 't ouch is.

* Det de Èllervastelaovendj de sjoeënste en gezelligste van alle vastelaovendje is

* Det ich dit jaor same mèt mien gevolg en 't jeugdprinsepaar veurop gaon door 't Moeërelandj

* Det wae det doon mèt zoeëveul meugelik live blaosmuziek van de geweldjige muzikante die Èll riek is.

* Det t'r inne cafe's genóg beer is veur erderein

* Det wae neet aan 't werk dinke, effe gein advies of geraeken mèt moeilikke maote, mer ieëst vastelaovendj vere.

Mien ingestèldje orde zal de meiste neet verbaze, dees orde is alles ómvattendj

euver weem ich bèn:

Ich zal regere in de “Orde van 't dörp”.

Bèste Moeërebuuk en Moeërinne,

Ich wil gaer aafsloete mèt uch eine geweldjige vastalaovendj te winse en det alles ónger

mien motto:

Ich gaef uch eine goje raod, haod deze vastelaovendj gein maot.