Ich prins Tim de 1e, 75e prins van de Moerebuuk.
In 1988 geboren in ‘t zekehoes van Wieërt mer gelukkig weer snel nao Ell, ‘t Moerelandj.
Zoon van Peter en Connie Heijkers-Arends, de aodste van de 3 van Benders naeve mien breurkes Rick en Mike. Ouch al zeen ze allebei groeëter as mich, sterker zeen ze zeker neet.

Same mèt mien prinses Myrthe Koene van de Graasbörgers oet Zöstere, woeëne wae op de Seringenstraot, mèt os zuuenkes Raf en Soy.
Vastelaovendj vere det geit mich good aaf; dao bèn ich groeët mèt gewore, ofja, mèt opgegruuedj. Same mèt mien adjudante en heur dames; aod prins Luuk en aod prinses Robin, Cuup en Sandy en Bastiaan en Femke gaon wae same mèt uch dees daag flink gaas gaeve.

In ‘t dageliks laeve bèn ich edere waek te vinje op de wèrk-lieër-borderie Genegenterhof van PSW in Grathem, woeë ich edere kier weer mèt plezeer gaon wèrke en mèt de sjoeënste verhaole thoes kom.

In miene vrieje tied bèn ich fanatiek lid van waterskiclub ‘de Maasmasters’, woeë ich veural in de zomer maondje mien kunste laot zeen en mien passie oet-oefen op de Maas.

Ieërder bèn ich jaore lang voetballer gewaesj bie ‘t sterreteam van RKESV en DFO, ‘t 3dj! Mer noe geneet ich van mien pensioen en slaop ich edere zunjig lekker oet… Oh, nae wacht, de jongens zeen gewuuen om half 7 wakker.

Verder bin ich 2x per jaor te vinje in ‘t brook mèt stichting Spook om der eine sjieke spoeëketocht van te make.

Ich doon daonaeve al 21 jaor mèt aan de Bóntje Aovendj mèt de groep ‘de Prusters’, om veur uch ein ruig stökske te bringe op de bühne.

Eder jaor stuit ‘t lèste wiekent van juni ein wiekentje TT-Assen geplandj in miene agenda, woeë beer drinke hoeëger in ‘t vaandel steit, as de race zelf.

Verder gaon ich gear mèt mien vrunj ein pilske drinke bie ‘t sjoeënste café van Limburg, ‘de Bachelorclub’.

Neet onbelangriek om te vertèlle is det ich trots lid bèn van VV de Prusters; eine vrinje- en vastelaovendjs-groep. Jaore lang wagens gebouwdj, mètgedaon aan de leedjesaovendj en vaak ozze naam ieër aan gedaon… Mer altied stinge wae mèt plezeer veuraan tiejens de vastelaovendj. Tegewoordig zitj ‘t groeëtste deil van ozze groep bie de raod of steit noe naeve mich op de bühne.

Bie de gratie van Groeëtvorst Jan, Groeëtvorst Henri, Vorst Steef en de Raod van Elf verklaor ich ’t volgendje:

  • Det ich mèt mien prinses Myrthe, mien adjudante Luuk, Cuup, Bastiaan en heur dames Robin, Sandy en Femke gaas gaon gaeve en d’r alles aan gaon doon óm van deze vastelaovendj ein geweldjig dik fieëst te make!
  • Det wae dit samen doon mèt ’t jeugdprinsenpaar, heur adjudante en de jeugdraod.
  • Det de men en de dames van de Raod van Elf samen mèt os d’r te gekke daag van gaon make.
  • Det wae dit jaor ouch weer moge gaon genete van live muziek van de Ellenthaler en de Koalderbend.
  • Det VV de Prusters dit jaor geine wagen hooftj te bouwen, mer hun bouwskills door geuftj aan VV de mini Prutsers!
  • Det de Bachelorclub dees fieëstdaag de erenaam maag dragen van ‘Prinsecafe’.
  • Det gae allemaol net alsof motj doon det de Zösterste weurd van prinses Myrthe Èlls zeen.
  • Det ich dees daag zal regere in de Orde van de Waterski!

En dit alles onger mien motto:

Normaal gaon ich waterskiën op de Maas, mer noe in ‘t Moerelandj gaef ich gaas!!!
Alaaf!