Op 14 juli ontvinge wae ’t trieste bericht det ós Ieërelid en Aod Prins Jan Verstappen in ’t biezeen van zien dierbare is euverleje.
Jan waas ónlosmakelik verbónje mèt De Moerebuuk en zal det ouch altied blieve. Wae verleze mèt Jan ein van de gróndjlèggers van ós vereiniging in zien huidige vorm. Breid gedrage ónger de Èller gemeinsjap mèt al zien comités en vriewilligers: ‘Veur ’t dörp, door ’t dörp’. Det waas ouch altied de driefvaer veur Jan.

Vanaaf ’t moment det Jan in 1978 Prins van ne Moerebuuk waerdje, waas hae same mèt Elly onaafgebroke lid van de Raod van 11. In 2020 krege ze same de hoeëgste titel die ós vereiniging kintj, ieërelid van CV De Moerebuuk. Die erkinning waas zeer op zien plaats en ouch mieër den verdeentj.

Mer leefst 35 jaor waas Jan penningmeister van ós vereiniging, ein rol die hae op zien eige maneer invöldje en die hum aaf en toe ouch get ‘penspien’ bezörgdje.

Mer zien betrokkeheid en inzèt veur de Èller vastelaovendj ging völ wiejer….

Hae waas ein van de drievendje krachten achter de oprichting van de comités. Van ’t ieërste comité midde jaore 80 (‘t foto comité), tot mieër den 15 comités die wae vandaag de daag kinne. Op zien initiatief waerdje ónger angere de jeugdroad bie de vereiniging betrokke, kwoom d’r ein speciale vastelaovesmès inne kirk en waerdje gestartj mèt ’t organisere van eine bóntje middig veur ós seniore. Nateurlik ‘kraakdje’ ’t ouch aaf en toe, en waas d’r get vreigel, mer veur Jan stóng ’t belang van de vereiniging altied veurop.

Ontelbare ore heet Jan in ziene bonnebak doorgebrachtj, van woeë-oet hae alles in de gate kós haoje mer ouch zichtbaar kós genete. Hae vónj ’t altied ‘SJIEK’ óm nao optraejes van de jeugd te kieke en kós hertelik lache óm ein gooj Bóntje Aovendj grap of ein sjuunse mop oppe senioremiddig.

Mèt groeëte dankbaarheid dinke wae trök aan alles wat Jan veur de Vastelaovendj en ós vereiniging beteikendj heet. Altied achter de sjerme regele en zörge… aaf en toe get te völ hui oppe vork… mer zeker ouch op zien eige maneer genete van wie de Vastelaovendj in Èll laeftj, van jónk tot aod. En stiekem waas hae dao den ouch terecht, erg gruuets op.

Jan, wae numme aafsjied mèt ein lach door alle sjoeëne herinneringe, en ein traon veur ’t gemis det wae veule.
Vanoet ós Moereland nog eine lètste … Salut!