Bèste Moeëre en Moeërinne,

De kèrmis is weer ein paar waeke achter ós. Dit beteikendj det wae as CV de Moerebuuk weer óntwake en opstarte richting ’t noewe seizoen 2022.
Nao ein apaart seizoen 2021 is ’t streve óm d’r in 2022 weer eine zoeë normaal meugelikke vastelaovendj van te gaon make in ós prachtige dörpke Èll.
Wie de situatie róndj de corona maotregele noe is wete we allemaol. Wie dees situatie in januari en februari geit zeen is nog koffiedik kieke. Wae höbbe beslote óm hie pas op te sjakele as dit van toepassing is op ós activiteite en hie noe nog niks aan te verbinje is.

’t noewe seizoen startj met prinsebal

Ouch höbbe wae beslote om ’t noewe seizoen op te starte met ’t oetrope van ós noew Prinsepare. Dit wiltj zègge det wae starte op zunjig 9 januari mèt de waalbekindje Jeugdjbóntjemiddig en ’t Prinsebal. Ouch steit d’r ós deze daag nog get te wachte mer det merktj gae vanzelf in de aanluip hie haer.
De normaal geplandje ELLAAF activiteit róndj 11-11 kumtj veur dit jaor den ouch te vervalle.

De euverige data zulle zoeë-as gebroekelik via ein hoes-aan-hoes stencil waere bekindjgemaaktj in ’t dörp.
(En staon inmiddels al online)

Wae as Moerebuuk gaon van ’t positieve oet veur kómmentj seizoen want:

Wae vere vastelaovendj!

Allaaf!

Bestuur CV de Moerebuuk, Èll