Ich, prins Jeroen de 1ste, 73ste Prins vanne Moerebuuk, jóngste en knapste zoon van Frans van de Bös en Gerda Derks, en broor van Roy.
In 1978 gebore in buurt Niesstraot/Hoverwei en op 10 jaorige leaftied verhoestj nao ’t prachtige Spargelheukske.
Dao woeën ich vandaag de daag nog steeds mèt völ plezeer same mèt mien Prinses Claudia (gebore in ‘t Walvaegersriek) en ós twieë zeuns Len en Noud.
In ’t dageliks laeve rie ich met mien buske gans Limburg door en bezeuk ich AVIA-tankstations veur óngerhaod en oppe woonsdig bèn ich te vinje in de Kruikenstad (Tilburg) woeë ich op ‘t hoofdkantoeër miene baas van gooj advieze veurzeen.
In miene vrieje tied bèn ich hieël mien laeve al op ‘t voetbalveldj te vinje. Lange tied bie RKESV…, ‘n klein oetstepke nao Veritas …, en tegewoordig bie DFO’20 in Kelpe.
Dao gaef ich door de waek de jeugd voetballes en op dónderdig lieër ich de veterane van Kelpe, Hunsel en Grathem wie ‘t mót. Op zaoterdig coach en grouwel ich get op de jeugd en op zunjig sjitter ich in ‘t vlaggesjeep van DFO’20, de veterane 1. Daonaeve bèn ich ein groeët fan van de bèste club van Nederlandj, PSV!
De 3e helft bèn ich op mien sterkst. Neet allein in de kantien van de voetbalclub, mer ouch in die van de tennisclub, woeë ich gaer ‘n pötje tennis speul en ein speciaal beerke drink.
As d’r örges in Èll un fieëstje is, dèn zeen wae same mèt mien adjudante, Jeroen, Stefan en Josh en de dames Anita en Marianne meistal waal vanne partie. En dèk kinne wae meujelik heives gaon.
Vastelaovendj vere zitj ós in ‘t blood. Mien pap en sjoeënpap zeen allebei prins gewaesj. Mien broor is jeugdprins gewaesj en miene aodste zoon kleuterprins.
Zelf waas ich 20 jaor geleje adjudant van prins Stefan de ieërste. Ouch zeen we 11 jaor lid gewaesj van de Raod van Elf. Det waas eine fantastische tied!
Noe ben ich zelf aan de beurt óm veurop te goan. En ich kan uch zègge: WAE HÖBBE D’R ZIN IN!
Bie de gratie van Groeëtvorst Jan, Groeëtvorst Henri, Vorst Steef en de Raod van Elf wil ich uch ‘t volgendje zègge:
• Det miene wins óm prins te waere noe is oetgekómme.
• Det wae same mèt de jeugdprins, jeugdprinses, heur adjudante en de jeugdraod d’r ein geweldjig fieëst van gaon make. Wae zulle mörge zeen weem det is. Kómtj mörge dus ouch allemaol nao ‘t oetrope van ‘t jeugdprinsepaar!
• Det wae same mèt ós adjudante Jeroen, Stefan, Josh en de dames Anita en Marianne d’r eine fantastische vastelaovendj van gaon make.
• Det dit zeker geit lökke mèt de geweldjige óngersteuning van de men en dames van de Raod van Elf!
• Det wae de Èller muzikante vraoge dit jaor ouch weer te zörge veur geweldjige live-muziek!
• Det wae ederein oprope óm dit jaor te zörge veur eine te gekke optocht met völ knauwel en flauwe humor van einselgangers, duo’s, kleine en groeëte groepe. Óngersteundj door sjoeën wages woeë Èll al jaore enorm trots op kan zeen!
• Det ich noe al benoedj bèn waat Bas Moeëne, Maarten Bombeeck, de Sjrumpelkes inclusief Nicol Orbon en die sterre vanne veterane gaon doon mèt de optocht, gae mótj nog anum.
• Det ich hoop det zelfs de minse mèt ein Ajax-hert tiedes deze vastelaovendj ouch plezeer kónne belaeve. Veural de manne van ós Londen-gruupke en die van ‘t 3e!
• Det ich de prins wil zeen veur groeët en klein, aod en jónk!
• Det ich dit jaor gaon regere in de orde van ’t Buske!
Ich wil uch allemaol ’nne geweldjige vastelaovendj winse en ich gaon aafsloete ónger mien motto:
Diesel en benzien aan de kantj, mèt Böske volle gaas door ‘t Moeërelandj!
