Proclamatie Prins Micky 1e, 72ste Prins vanne Moerebuuk
Ich, Prins Micky 1e, 72ste Prins vanne Moerebuuk, zoon van Math Beurskens en Christa Smeets.
Gebore op 11 juli 1994 in ‘t zekehoes in Wieërt, mer gelökkig weer snel trök gebrachtj nao ‘t Moerelandj.
‘t Vastelaovesblood höb ich gekrege van miene Opa, Wiel Beurskens, mede-oprichter, aod vorst en aod prins vanne Moerebuuk.
Ich bèn opgegruudj oppe Craenenstraot 11, mèt mien 3 breurs, Jim, Bowen, en Jur. Neet allein de leefdje, mer ouch de leefdje veur de Vastelaovendj, deil ich mèt mien Prinses Sofie van Logtestijn, of zoeë-as ederein ‘t zeet, Sofie vanne geiten.
Same mèt Sofie woeën ich sinds kort in ós eige huuske in Èll.
In ‘t dagelikse laeve staon ich veur de klas. Ich gaef technieklesse houtbewèrking, op Het Kwadrant in Wieërt. In miene vrieje tied bèn ich gaer aan ’t klusse. Zoeë höb ich same mèt mien prinses eine aoje camper complieët opgeknaptj. Ouch vinj ich ‘t lekker óm get te póngele in de aoj wèrkplaats van opa. Ein pötje beer drinke mèt mien vrinj gaon ich ouch zeker neet oet de weeg.
Same mèt mien adjudante Cas, Joost en Thom en de dames Bo, Maud en Romy, zeen wae op völ plaatse óngerdeil van ‘t vereinigingslaeve. Zoeë-as de organisatie van de Zomercarnaval, spoeëk bie Stichting Spook, en lid van de geweldjige vastelaovesgroep en Gouwe Rog winnaar VV de Vervaelers… die dit jaor dus zeker weer mèt mótte loupe mèt de Èller optocht. Gae hooftj neet veur eine gouwe rog te gaon, aangezeen wae dae nog steeds in ós bezit höbbe.
Daonaeve bèn ich ouch nog op ‘t voetbalveldj te vinje. Sinds dit jaor staon ich ónger de lat bie voetbalclub Veritas oet Neeritter.
Bie de gratie van Groeëtvorst Jan, Groeëtvorst Henri, Vorst Steef en de Raod van Elf wil ich uch ’t volgendje dudelik make:
- Miene droum óm prins te waere is bie deze oetgekómme.
- Det wae same mèt de Jeugdprins, Jeugdprinses, heur adjudante en de jeugdraod d’r ein geweldjig fieëstje van gaon make. Weem det geit waere zeetj gae mörge, dus kóm allemaol nao de kinjer bóntje middig.
- Det dit ouch zeker geldj veur mien adjudante, Cas, Joost en Thom en de dames Bo, Maud en Romy, wae gaon d’r alles aan doon óm ‘t Moerelandj oppe kop te zètte, zeker naodet wae ein jaor extra höbbe mótte wachte.
- Det wae dit nateurlik ouch same mèt de men en dames van de Raod van 11 doon.
- Det wae hope det de Èller muzikante d’r veur zörge det d’r zoeë völ as meugelik livemuziek is tiejes de vastelaovesactiviteite.
- Det VV de Vervaelers veur ‘t ieëst eine Prins inne groep te pakke heet.
- Det de groep Spieje veur de twieëdje kieër ein prinses inne groep heet.
- Det wae d’r vanoet gaon det allebei de groepe dus extra hel gaas gaon gaeve dit jaor.
- Vanaaf vandaag zal de Craenenstraot, de Prinsenstraot genumdj waere.
- Det ich, mien Prinses en adjudante d’r echt óntzettend völ zin in höbbe, en neet wille det d’r emes aan de kantj blieftj staon. Vastelaovendj vere wae same!
- Det ich neet allein ‘t vastelaovesblood van Opa höb ge-orve, mer ouch ‘t wèrke mèt hout.
- Det ich daoróm, net als opa vreuger, zal regere in de orde van ’t Haemerke!
Lang genógt gezeiverdj, noe is ‘t tied óm te fieëste. Ich wil uch allemaol eine geweldjige Vastelaovendj winse, dit ónger mien motto: